Frytet e Istigfarit – Përmbledhje

Prej fryteve të Istigfarit janë:

• Falja e gjynaheve dhe fshirja e të këqijave:

I Lartësuari thotë: “Ai që vepron një të keqe apo i bën padrejtësi vetvetes, pastaj i kërkon falje Allahut, do ta gjejë Allahun Falës, të Mëshirshëm.” (En-Nisa’ : 110)

• Siguria prej dënimit:

I Lartësuari thotë: “Allahu nuk do t’i ndëshkojë, përderisa ata kërkojnë falje..” (El-Enfal : 33)

• Zhdukja e brengave, përfitimi i rrizkut dhe dalja nga vështirësitë:

Prej Ibn Abbasit (radijAllahu anhum) përcillet se i Dërguari (alejhi selam) ka thënë: “Kush bën shpesh istigfar Allahu do t’ia heqë çdo brengë, do e lirojë nga çdo vështirësi dhe e furnizon nga nuk ia pret mendja.” (Shejkh Bin Baz e cilëson të mirë.)

• Eshtë shkak për forcën në tokë, zbritjen e shiut dhe shtimin e ujërave:

I Lartësuari ka thënë për Hudin (alejhi selam) se i ka thënë popullit të tij: “O populli im! Kërkojini falje Zotit tuaj dhe pendohuni tek Ai. Ai iu lëshon shi me bollëk dhe fuqisë suaj i shton fuqi. E mos refuzoni e të bëheni mëkatarë.” (Hud : 52) 

• Zbritja e mëshirave hyjnore dhe shpëtimit në dynja (këtë botë) dhe Ahiret (botën tjetër):

Allahu i Lartësuar thotë: “Pendohuni tek Allahu të gjithë ju o besimtarë, ndoshta do të shpëtoni” (En-Nur : 31) 

• Zhdukja e vështirësive prej robërve e vendeve, dhe ngritjes së sprovave prej popujve dhe individëve, sidomos nëse buron prej zemrave të sigurta, të sinqerta e besimtare në Allahun:

I Lartësuari thotë: “Allahu nuk do t’i ndëshkonte nëse ata do të kërkonin falje” (Enfal : 33)

• Zbritja e shiut të bollshëm, bereqetit në furnizime e fryte, shtimit të zhvillimit dhe pasardhësve, shtimit të mirësive në fusha e toka:

Sikurse i Lartësuari ka thënë duke rrëfyer për Nuhun (alejhi selam): “Thashë: Kërkojini falje Zotit tuaj, Ai është Falës. Ai ju lëshon nga qielli shi me bollëk. Ju shumon pasurinë dhe fëmijët, ju bën të keni kopshte dhe ju jep lumenj” (Nuh : 10-12)

• Zemërimi i shejtanit:

Në një hadith i Dërguari (alejhi selam) thotë: “Shejtani ka thënë: Pasha Fuqinë Tënde o Zot! Unë vazhdoj t’i humbasë robërit e Tu përderisa shpirtrat i kanë në trupa. Zoti i Lartësuar tha: “Pasha Fuqinë dhe Madhështinë Time! Unë vazhdoj t’i fal ata përderisa më kërkojnë falje Mua.” (saktësoi Albani)

• Zoti i kënaq ata që i kërkojnë falje me një jetë të mirë, i furnizon gjerësisht me mirësi duke përjetuar lumturi:

I Lartësuari thotë: “Kërkojini falje Zotit tuaj dhe pendohuni tek Ai, se Ai do t’ju mundësojë përjetime të mira deri në një afat të caktuar dhe çdo punëmiri i jep shpërblimin e merituar.” (Hud : 3) 

• Se ata që bëjnë istigfar janë njerëzit me më pak gjynahe:

I Dërguari i Allahut (alejhi selam) ka thënë: “Jeta e mirë dhe e kënaqshme do të jetë për atë që do të gjejë në fletushkën e tij shumë istigfar.” (saktësoi Mundhiriu dhe Albani)

I thanë dikujt prej selefëve: Si je në fe? Iu përgjigj: E gërris me gjynahe dhe e lëmoj me istigfar.

Ibn Kajjimi thotë: “E pyeta Shejkhul Islam ibn Tejmijjen (Allahu i mëshiroftë të dy!) se disa njerëz pyesin: Cila gjë është më e dobishme për robin: tesbihu (thënia: SubhanAllah), apo istigfari (thënia: Estagfirullah)? Tha: “Nëse rroba është e pastër, parfumosja me temjan dhe ujë trëndafili i bëjnë më shumë dobi, e nëse është e pisët, atëherë sapuni dhe uji bëjnë më shumë dobi.” (El Uabilu sajjib)