Shenjat e natës së Kadrit – Mësime Ramazani (42)

Allahu i Lartësuar thotë: “Në të zbresin melekët dhe shpirti, me lejen e Zotit të tyre, për çdo çështje. Ajo është paqe, derisa të shfaqet agimi.”

Prej Zir Ibn Hubejshit përcillet se ka thënë: “Unë kam dëgjuar Ubej Ibn Ka’bin të thotë se Abdullah Ibn Mes’udi ka thënë: ‘Kush fal namaz nate përgjatë gjithë vitit e arrin natën e Kadrit.’ Ubeji pas kësaj fjale të Ibn Mes’udit ka thënë: ‘Pasha Allahun përveç të Cilit nuk ka të adhuruar tjetër me të drejtë, ajo (nata e Kadrit) gjendet në Ramazan. Pasha Allahun, unё e di se cila natë është ajo. Ajo është nata në të cilën na urdhëroi i Dërguari i Allahut të ngriheshim e të faleshim. Ajo është nata që i paraprin agimit të 27 të Ramazanit. Prej shenjave të saj është lindja e diellit në mëngjes i bardhë e pa rreze.” [1]

Në një transmetim të Ibn Hibanit thuhet: “Prej shenjave tё natёs sё Kadrit është lindja e diellit në mëngjes, i bardhë e pa rreze, si një tas.” [2] Nga Ibn Mes’udi transmetohet se i Dёrguari i Allahut ka thënë: “Nata e Kadrit është në gjysmёn e shtatëshes së fundit të Ramazanit. Dielli në mëngjesin e saj lind i qartё e pa rreze.” Ibn Mes’udi më pas ka thënë: “Unë e vështrova lindjen e Diellit dhe ishte ashtu sikurse e kishte përshkruar i Dërguari i Allahut.” [3] Prej Ebu Hurejres përcillet se i Dërguari i Allahut ka thënë për natën e Kadrit: “Ajo është nata e njëzeteshtatë ose e njëzetenëntë. Melekët atë natë janë në tokë me një numër më të madh se numri i guralecëve.” [4]

Ubadeh Ibn Samiti përcjell se i Dёrguari i Allahut ka thënë: “Disa shenja të natës së Kadrit janë: ajo është natë e kthjellët dhe e ndritshme, si njё natё me hёnё, e qetё, as e ftohtë e as e nxehtë dhe nuk mund të ketë goditje meteorësh derisa të agojë. Shenjë tjetër është edhe dielli që lind në mëngjes i qartë e pa rreze, si hëna katërmbëdhjetëshe. Atë ditë, shejtanit nuk i lejohet të dalë bashkë me të.” [5]

Xhabiri përcjell se i Dërguari i Allahut ka thënë: “Unë doja të tregoja për natën e Kadrit, por pastaj e harrova. Gjithsesi, ajo është në 10 netëshin e fundit. Ajo është natë e kthjellët, e ndritshme, as e nxehtë e as e ftohtë. Ajo duket si natë me njё hёnё qё me ndriçimin e saj ia zbeh ndriçimin yjeve. Shejtani i asaj nate nuk del, derisa të çelë agimi.” [6]

Ibn Abassi transmeton se i Dërguari i Allahut ka thënë në lidhje me natën e Kadrit se: “Ajo është natë e kthjellët, as e nxehtë e as e ftohtë. Dielli në mëngjesin e saj lind i kuq e i dobët.” [7]

Dobitё dhe dispozitat

E para: I lejohet dijetarit të mos tregojë ndonjë gjë që di, nëse mendon se njё veprim i tillё ёshtё i dobishёm, sikurse fshehu Ibn Mes’udi diturinë që kishte mbi natën e Kadrit, me qëllim që njerëzit të mos neglizhonin e të mos rrinin pa falur namaz nate gjatё 10 netëve.

E dyta: Dijetari u sqaron njerëzve atë që duhet ta dinë, sikurse sqaroi Ubej Ibn Ka’bi natën e Kadrit.

E treta: Lejohet që dijetarët të përpiqen dhe të kenë mendime të ndryshme, për sa u përket dobive dhe dëmeve. Kjo nuk është e ndaluar, nëse vjen si rrjedhojë e një përpjekje të saktë dhe kur qëllimi është arritja e të vërtetës.

E katërta: Nata e Kadrit gjendet në 10 netët e fundit. Shpresohet që ajo të jetë në një prej netëve teke dhe nata më e shpresuar është nata e 27, sikurse betohet për një gjë të tillë Ubej Ibn Ka’bi.

E pesta: Këto tekste tregojnë se nata e Kadrit ka disa shenja, të cilat janë:

1. Numri i madh i melekëve, me në krye Xhibrilin (alejhi selam), që zbresin këtë natë, për të marrë pjesë me njerëzit që falen nëpër xhamitë e tyre. Numri i tyre është aq i madh, saqë ia kalon numrit të guralecëve të tokës. Kjo shenjë nuk u shfaqet njerëzve.
2. Shpëtimi shtohet në natën e Kadrit, në sajë të bindjes dhe nështrimit të njerëzve ndaj Allahut.
3. Dielli në mëngjesin e asaj nate lind i bardhё, pa rreze. Shkaku i kësaj, sipas disa dijetarëve, është ngritja në qiell e melekëve, drita dhe krahët e të cilëve mbulojnë dhe pengojnë rrezet e diellit, [8] pasi atë natë numri i melekëve që zbresin në tokë është shumë i madh.
4. Nata e Kadrit është e kthjellët, e qetë, as e ftohtë e as e nxehtë, por kjo është një çështje relative, e cila ndryshon në bazë të vendeve të ndryshme, ku të ftohtët dhe të nxehtët janë të ndryshme. Megjithatë, ajo natë nuk është as e ftohtë e as e nxehtë, në lidhje me netët që i paraprijnë dhe ato që e pasojnë.
5. Shejtani nuk del me lindjen e diellit në mëngjesin e natës së Kadrit, kjo sepse dielli lind midis dy brirëve të Shejtanit, përveç mëngjesit të natës së Kadrit.
6. Shumica e shenjave që janë përmendur u bëhen të qarta njerëzve vetëm pasi nata e Kadrit ka kaluar. Dobia e kësaj është që, ai i cili e arrin këtë natë, të falënderojë Allahun për suksesin dhe angazhimin me adhurim që i mundëson Ai gjatë asaj nate. Nga ana tjetër, të pikëllohet neglizhenti ndaj natës së Kadrit, i cili tani duhet të vendosë që të angazhohet plotësisht në vitin që vjen për ta arritur atë.
7. Këto shenja janë sistematike për çdo natë Kadri që vjen dhe nuk janë të veçanta për periudhën profetike.
8. Muslimani duhet të përpiqet që ta gjejë këtë natë, për shkak të vlerave të mëdha që ajo ka.

[1] Muslimi 762.

[2] Ibn Hiban 3690.

[3] Ahmedi (1/406), saktësoi Ahmed Shakir 3857.

[4] Ahmedi (2/519), saktësoi Ibn Khuzejme 2194, Albani e ka konsideruar hadith të mirë (Hasen) shih Sahihah 2205.

[5] Ahmedi (5/324), Hejthemi ka thënë se personat në zinxhirin e transmetimit janë të besueshëm, Zewaid (3/175).

[6] Ibn Khuzejme 2190, Ibn Hiban 3688, saktësoi Albani.

[7] Ibn Khuzejme 2192, saktesoi Albani.

[8] Ikmal el mualim 4/148, sherh en nevevij ala Muslim 8/65, el mufhim 2/391, ed dibaxh 3/259, fajdul kadir 5/396.