Prej Ibn Umerit përcillet se, disa shokë të Profetit (alejhi selam) panë në ëndër natën e Kadrit të ishte në shtatë netë e fundit. Atëherë, i Dërguari i Allahut tha: “Unë po shoh që ëndrrat tuaja janë bashkuar në shtatë netët e fundit, kështu që kush dëshiron ta gjejë atë, le të përpiqet gjatë shtatë netëve të fundit.”
Në një transmetim të Muslimit thuhet: “Kërkojeni atë në dhjetëshen e fundit, e nëse ndonjëri prej jush plogështohet ose nuk mundet, atëherë të mos humbasë në shtatëshen e mbetur.” Në një transmetim tjetër të Muslimit thuhet: “Kërkojeni natën e Kadrit në shtatë netët e fundit.” [1]
Dobitë dhe dispozitat:
E para: Ky ummet është i ruajtur prej gabimit në transmetim, në mendim dhe në ëndërr, sepse i Dërguari i Allahut e mori në konsideratë bashkimin e ëndrrave të tyre mbi të njëjtën çështje. [2]
E dyta: Nata e Kadrit duhet kërkuar dhe duhet kaluar me adhurim, për shkak të mirësisë dhe vlerës së madhe që ka. Diçka e tillë nuk është detyrë, por është e pëlqyeshme. [3]
E treta: Në hadithin e lartpërmendur tregohet për peshën e madhe që ka ëndrra, lejimin e mbështetjes tek ëndrra pёr orientimin në çёshtjet egzistenciale, me kusht që diçka e tillë të mos bjerë ndesh me rregullat e sheriatit, [4] dhe të mos teprohet në marrjen përbazë të tyre, aq sa të dilet nga rruga e drejtë e të ndërpriten veprat e mira.
E katërta: Ëndrrat mund të jenë prej Allahut, mund të jenë pëshpëritje të vetvetes dhe mund të jenë prej shejtanit. Kur ëndrrat e besimtarëve përputhen, atëherë kemi të bëjmë me diçka të vërtetë, sikundër përputhen transmetimet dhe mendimet e tyre. Ndodh që një person të ngatërrohet, të gënjejë, të gabojë në mendim ose të zgjedhë me dëshirë të kotën, mirëpo nëse bashkohen disa vetë për një çështje, ata nuk bashkohen për të kotën. [5]
E pesta: Në të gjejmë argument mbi të punuarit sipas mendimit të shumicës, me kusht që të mos bjerë ndesh me ndonjë tekst fetar, me unanimitetin e umetit apo me ndonjë analogji juridike të qartë. [6]
E gjashta: Disa prej sahabëve panë një ëndërr të njëjtë, se nata e Kadrit është në shtatë netët e fundit të ramazanit. Atë vit, i Dërguari i Allahut urdhëroi që nata e Kadrit të kërkohej përgjatë shtatë netëve të fundit të ramazanit, kështu që këto net janë më të shpresuarat për natën e Kadrit. [7]
E shtata: Disa njerëz mund ta identifikojnë natën e Kadrit nëpërmjet ëndrrës, duke parë disa prej shenjave dhe ndriçimit të saj, apo duke parë në ëndërr dikë që i thotë se kjo është nata e Kadrit, ose Allahu i vendos në zemër shikim dhe qartësi, me anë të së cilës e gjen natën e Kadrit. [8]
[1] Buhariu 1911, Muslimi 1165.
[2] I’alam el mueki’in 1/84.
[3] El Istidhkar 3/416.
[4] Sherh Ibn Mulakin alal Umdeh 5/411, Fet’hul Bari 4/257.
[5] Minhaxh es suneh en nebeuijeh 3/500, Medarixh es-Salikin 1/51.
[6] Sherh Ibn Mulakin alal Umdeh 5/414
[7] Ibn Batal në shpjegimin te tij të Sahihul Buhari 4/151 mbi hadithin e Ibn Umer “Kërkojeni atë në shatë netët e fundit” me këtë ka për qëllim vitin në të cilin sahabët panë të njëjtën ëndërr mbi natën e Kadrit e cila është nata e njëzet e tre sepse ai në hadithin e Ebu Saidit ka thënë: ‘Kërkojeni atë në dhjetëshen e fundit, në netët teke. Unë pashë në ëndërr sikur rashë në sexhde në ujë e në baltë. Natën e njëzet e një ra shi.” Sipas këtij hadithi të Ebu Saidit, nata e Kadrit në atë vit ka qenë jashtë shtatë netëve të fundit. Tahaui ka thënë: ‘Sipas këtij shpjegimi, nuk bien ndesh hadithet dhe lajmet mbi natën e Kadrit.’
[8] Mexhmu el Fetaua 25/286.